B&U Somatik flytir í H-bygningin

Tað verður ein stórur dagur á Landssjúkrahúsinum í morgin, mikudagin tann 27. november, tá B&U Somatik flytir í H-bygningin.

Barnadeildin hevur áður verið staðsett á B5 og Neonatal á A2, og flytingin inniberur sostatt eina samanlegging av deildum. Framyvir verða deildirnar kallaðar B&U Somatik. Sum navnið sipar til eru tað børn og ung við likamligum sjúkum, ið framvegis verða innløgd á deildini.

Flytingin hevur eisini við sær, at bæði sjúklingar og starvsfólk fáa betri karmar og umstøður at arbeiða í, og nýggi bygningurin gevur fleiri møguleikar innan viðgerð. 

Við rúmligari hølum, nýggjari tøkni og umhvørvi, ið leggur dent á trygd og nánd, verður tað møguligt at veita eina enn betri viðgerð. Fleiri av starvsfólkunum, sum hava verið partur av flytingini, leggja dent á, hvussu týdningarmikið tað er at hava góðar karmar, ið stuðla teimum í dagliga arbeiðinum. Tað gevur starvsfólki møguleikan at veita eina meira persónliga og fjølbroytta røkt, serliga til viðkvomu ov tíðliga føddu nýføðingarnar og foreldur teirra.

Flytingin er eisini ein liður í menningarætlanini hjá Landssjúkrahúsinum, sum hevur til endamáls at tryggja dygdargóða heilsutænastu alt lívið.

Vónandi verða nýggju hølini ein týðandi liður í at betra bæði arbeiðsumhvørvið hjá starvsfólkunum og upplivingina hjá sjúklingunum.