Suðuroyar Sjúkrahús

Suðuroyar Sjúkrahús er eitt av trimum sjúkrahúsum í Sjúkrahúsverkinum og er staðsett á Tvøroyri. Sjúkrahúsið er eitt vælvirkandi, nýmótans sjúkrahús, ið tekur ímóti sjúklingum úr øllum Føroyum.

Suðuroyar sjúkrahús er eitt akuttsjúkrahús, hvørs uppgáva er at kanna, viðgera, røkta og venja sjúklingar uppaftur.

Sjúkrahúsið er eitt blandað medisinskt/kirurgiskt sjúkrahús við 20 seingarplássum. Her starvast 120 fólk býtt á 24 starvsbólkar.

Endamálið er at veita eina dygdargóða heilsutænastu til allar sjúklingarnar, ið koma til viðgerð á Suðuroyar Sjúkrahúsi.

Tríggir yvirlæknar starvast á sjúkrahúsinum. Ein yvirlækni í almennari kirurgi við sergrein innan urologi, ein medisinskur yvirlækni við sergrein innan kardiologi og ein yvirlækni við sergrein innan anæstesi og pínuviðgerð. Yvirlæknar við sergrein innan onnur øki starvast javnan í styttri vikariatum á sjúkrahúsinum.

Sjúkrahúsið veitir viðgerðir innan almenkirurgi, urologi, ortopædi, gastroskopi, koloskopi, nýrasteinsknúsan og áhaldandi pínu.

Á kardiologisku starvsstovuni á Suðuroyar Sjúkrahúsi verða kanningar gjørdar av innløgdum og ambulantum sjúklingum.

Røntgendeildin á Suðuroyar Sjúkrahúsi er útgjørd við framkomnari røntgen og CT-skannara.

Rannsóknarstovan á Suðuroyar Sjúkrahúsi ger kanningar av innløgdum og ambulantum, eftir tilvísing frá lækna. Eftir tørvi verða eisini blóðroyndir tiknar heima hjá sjúklingum. Rannsóknarstovan vitjar regluliga á læknamiðstøðini í Vági. Blóðgevar verða tappaðir á Rannsóknarstovuni mánadagar.

Á Suðuroyar Sjúkrahúsi er eisini ein nútímans Ergo- og fysioterapi, har bæði innlagdir og ambulantir sjúklingar fáa viðgerð eftir tilvísing frá lækna. Eisini bjóðar deildin Parkinson-endurvenjing tvær ferðir um árið, eftir ávísing frá serlæknum í neurologi.