Neyðtøka
Hevur tú verið fyri neyðtøku ella neyðtøkuroynd, kanst tú seta teg í samband við neyðtøkutilbúgvingina á Landssjúkrahúsinum á tel. 30 46 00.
Tá tú kemur á sjúkrahúsið, verður ein sjúkrarøktarfrøðingur um teg, meðan tú verður kannað av serlækna í kvinnusjúkum.
Tær nýtist ikki at melda tilburðin til Politiið, um tú setir teg í samband við okkum. Men vit goyma prógvini í 1 ár, um tú seinni ynskir at melda tilburðin.
Um tú hevur tørv á víðari framferð, vegleiða vit teg í mun til aðrar myndugleikar.
Neyðtøkutilbúgvingin tekur sær av tær, sum hevur verið fyri neyðtøku ella neyðtøkuroynd innanfyri seinasta mánaðin, og seinastu 2 mánaðirnar, um tú hevur verið fyri tilburðinum uttanlands. Er longri tíð gingin, eigur tú at venda tær til tín kommunulækna.
Hvat hendir tá tú ringir til okkum?
Tú fært samband við ein sjúkrarøktarfrøðing, sum verður um teg, tá tú kemur á sjúkrahúsið.
Vit svara alt samdøgrið allar dagar í vikuni.
Vit síggja ikki hvørjum nummari, tú ringir frá.
Kanning og uppfylging
Um neyðugt verður tú kannað av serlækna í kvinnusjúkum, og royndir verða tiknar fyri at útiloka smittu við kynssjúkum.
Vit fylgja upp um tína støðu nakrar dagar seinni og vegleiða teg um víðari framferð ella hjálp frá øðrum myndugleikum.
Sálarfrøðilig hjálp
Um tú hevur tørv á samrøðum við ein sálarfrøðing eftir tilburðin, so setur ein sálarfrøðingur seg í samband við teg innan 72 tímar eftir tilburðin (gerandisdagar). Sálarfrøðingurin bjóðar tær inn til eina samrøðu innan tvær vikur eftir tilburðin. Sálarfrøðiligu samrøðurnar eru eitt ókeypis tilboð.
Kvinnuhúsið
Ert tú útsett fyri harðskapi, ætlar tú tær at fara ella leitar tú eftir einum friðskjóli, er Kvinnuhúsið ein møguleiki. Í Kvinnuhúsinum fæst ráðgeving, vegleiðing og hjálp til sjálvhjálp. Eisini ber til at búgva á Kreppumiðstøðini í Kvinnuhúsinum eitt tíðarskeið. Børn eru vælkomin við.
Les meira á www.kvinnuhusid.fo.