Heimavitjan

Sjúkrahúsið setir seg í samband við Bú- og heimatænastuna á leið 2 vikur áðrenn útskrivan. Ein ætlan verður gjørd fyri, nær heimavitjanin skal fara fram.

Starvsfólk greiða tær og einum avvarðandi frá mannagongdini. Mett verður um, um tú  ert før/førur fyri at vera við til sjálva heimavitjanina, og síðani verður avtala gjørd við Sjúkraflutningstænastuna.

Heimavitjanin verður framd við fysioterapeuti ella ergoterapeuti frá sjúkrahúsinum saman við einum økisterapeuti frá Bú– og heimatænastuni. Syrgt verður fyri at maki og/ella avvarðandi eru til staðar undir heimavitjanini.

Eftir heimavitjanina syrgir sjúkrahúsið fyri, at hjálpartól og møguligar umvælingar verða bílagdar og settar í verk.

Umsókn verður send Hjálpartólamiðstøðini, og hjálpartólini verða send heim til tín. Dagfesting verður sett á heimferðina, og eru hjálpartólini ikki komin til ásetta tíð, kunnu hjálpartól útvegast til láns frá sjúkrahúsinum. Hesi letur tú inn, tá hjálpartólini frá Hjálpartólamiðstøðini eru komin.

Hjálpartólini kunnu vera song, seingjarborð, kokustólur, gongustativ, wc-hækkari o.a. Veitingartíðin er á leið fimm dagar. Er talan um akuttmál, er veitingartíðin tveir dagar.

Er talan um broytingar í heiminum, skal ráðgevi frá Hjálpartólamiðstøðini vera við á heimavitjanini átta vikur áðrenn ásettu tíð. Her er talan oftast um, at pláss skal gerast fyri eini brúsu uttan kant til sjúkling, sum hevur tørv á koyristóli ella á annan hátt er vorðin avlamin orsakað av sjúku.

Sjúkrahúsið setir seg í samband við Hjálpartólamiðstøðina og fylgir við, um hjálpartólini koma til tíðina. Tú fært somuleiðis tíð til at koma til ambulanta venjing. Ber hetta ikki til, kemur ein terapeutur frá Bú- og heimatænastuni at venja við tær heima.