CT skanning av hjartanum

Tak blóðroynd áðrenn kanning
Okkum tørva eina blóðroynd av tínum se-kreatinini áðrenn kanningina. Hevur tú diabetes, skal blóðroyndin ikki vera eldri enn 1 viku. Hevur tú ikki diabetes, skal blóðroyndin ikki vera eldri enn 3 mánaðir. Set teg í samband við ávísandi lækna fyri at fáa blóðroyndarseðil útflýggjaðan.

Við barn og bróstageving
Boða okkum frá í góðari tíð um tú ert við barn ella gevur bróst, av tí at tað kann ávirka, hvussu, hvør ella nær kanning verður gjørd.

Tak tín heilivág sum vanligt
Heilivágur ávirkar ikki kanningina, so tú kanst taka tín heilivág sum vanligt.

Nýt ikki metalprýði o.a
Áðrenn kanningina – og helst heimanifrá – skalt tú taka allir metallutir, sum t.d. metalprýði, ur, og piercingar av.

Tú mást IKKI:

• drekka kaffi, té ella kola frá midnátt kvøldi fyri kanningina.
• roykja 2 tímar áðrenn kanning.
• íðka ítrott ella annað, ið er kropsliga krevjandi
• taka viagra 48 tímar innan kanning.

Í fyrireikingar rúminum
Tú møtir í bíðirúminum til CT skannaran á 1. hædd, eftir avtalu við seingjardeildina B8, har ein sjúkrarøktarfrøðingur tekur ímóti tær. Pulsur og blóðtrýst verða mátað, og tú fært  eitt lítið katetur (venflon) lagt í eina æðr við einari nál. Um pulsurin er ov høgur, fært tú heilivág fyri at lækka hann, og tað hevur við sær bíðitíð, ímeðan heilivágurin virkar. Pulsurin skal helst liggja undir 60, fyri at fáa eina væleydnaða kanning við góðari góðsku.

Í kanningar rúminum
Tveir radiografar taka ímóti tær og fyrireika teg til skanningina. Tú liggur á einari legu, og fært elektrodur, sum máta hjartaslátturin, á bringuna. Pulsur og blóðtrýst verður aftur mátað, og tú verður vegleidd/ur við andadráttinum.

Sproytan við skuggaevninum verður bundin saman við kateturinum tú hevur fingið lagt í æðrina. Skuggaevni verður sprænt inn ígjøgnum kateturið undir sjálvari skanningini. Tú kanst fáa kensluna av hita í øllum kroppinum, trongd til at lata vatnið og metal smakk í munnin. Hetta fer tó skjótt burtur aftur. Kateturið verður tikið úr, tá ið skanningin er liðug.

Fyri at víðka um æðrarnar í hjartanum soleiðis at tær betur síggjast á myndunum, fært tú nitroglycerin sproyta undir tunguna. Hetta kann geva eitt sindur av høvupínu.

Tað verður stremba eftir at skannað, tá ið hjarta er í hvílufasu,fyri at fáa minst rørðslu á myndunum.

Kanningartíð
Kanningartíðin er uml. ½-1 tíma tilsamans, og harumframt skalt tú vera á Røntgendeildini í ½ tíma eftir kanningina, av tí at tú hevur fingið skuggaevni.

Tú hevur fingið skuggaevni
Skuggaevni kann elva til ovurviðkvæmi, og tí skalt tú bíða í móttøkuni á Røntgendeildini í ½ tíma eftir kanning. Ovurviðkvæmi kann m.a.vísa seg við útslett, kvalma, spýggju, trongd ella skriða í hálsinum. Merkir tú nakað óvanligt, skalt tú siga frá í móttøkuni.

Drekk ríkiligt
Drekk nógva vætu restina av degnum t.d. vatn, saft ella juice – minst 2 litrar. Tá ið kroppurin fær nokk av vætu, hjálpur tú nýrunum at fáa skuggaevni úr kroppinum aftur. Eftir einum døgni er alt skuggaevni farið úr kroppinum við landinum, og hetta hvørki sæst ella merkist.

Svar uppá kanningina verður latið ávísandi lækna, og tú skalt sjálv/ur biðja um svarið, uttan so at onnur avtala er gjørd. Tú fært nærri kunning um svartíðina á kanningardegnum.

Hevur tú spurningar um kanningina, ert tú vælkomin atseta teg í samband við Røntgendeildina.