Vegleiðing í sambandi við fosturtøku

Eftir at tú hevur fingið fosturtøku og fingið eina útskravan, er vanligt við løttum eymleika í undirlívinum og blóðugum floti í einar 10 dagar.

Í hesum tíðarskeiði er vandin fyri undirlívsbruna øktur. Tí eigur dentur at vera lagdur á reinføri. Um møguleiki er til tess, mæla vit til, at tú skolar tær í neðra nakrar ferðir dagliga.

Meðan tú bløðir verður frárátt at:

• brúka tamponir
• fara í bað
• hava samlegu
• svimja.

Set teg í samband við lækna:

• um tú bløðir sum menstruatión ella meir
• um tú fært undirlívspínu
• um tú fært fepur.

Tú fært eggloysn um 14 dagar, so møguleiki er fyri at gerast við barn longu áðrenn næstu menstruatión, sum annars kemur um umleið ein mánað.