Koloskopi
Koloskopi er ein kikarakanning av langanum.
Nærri kunning um kanning
Innan kanning
Tað er umráðandi, at tarmurin er væl og virðiliga tømdur, so tarmrovan sæst so væl til ber. Tú fært boð um at keypa Picoprep til tøming av maganum og at fylgja vegleiðingini í faldaranum, sum fylgir við.
Um tú tekur heilivág, skalt tú taka hann sum vanligt. Tekur tú jarntablettir, skalt tú gevast við teimum sjey dagar áðrenn, tú byrjar tømingina.
Hevur tú insulinkrevjandi sukursjúku, ella tekur tú blóðtynnandi, skalt tú seta teg í samband við læknaskrivaran á tlf. 34 33 00.
Tømingin ger, at tú fært diarré, sum virkar innan 1-3 tímar. Tú kanst fáa vaml og høvuðpínu av tømingini.
Tveir dagar undan kanningini skalt tú taka tvær tablettir av Dulcolax kl. 12.00 og kl. 22.00. Et ikki grovt breyð ella frukt við kjarnum, men vanligan kost. Drekk ríkiligt, helst 2-3 litrar um døgnið (íroknað vatn, saft, djús, te og kaffi).
Dagin fyri kanningina skalt tú ikki eta fasta føði ella drekka mjólkarúrdráttir. Tú kanst fáa tunnar vætur, sum klára suppu, saft, djús uttan fyllu, sodavatn, vatn, te og kaffi.
Tað er av týdningi, at tú drekkur ríkiligt allan dagin, gjarna søtar vætur (ikki light/sukurfrítt).
Hetta er eisini galdandi fyri tey, ið hava sukursjúku.
Kl. 15.00:
- Fyll eitt glas við køldum vatni.
- Koyr tað eina brævið av Picoprep í.
- Rør blandingina í 2-3 min. Tá tað er liðugt at brúsa, er blandingin klár at brúka. Blandingin er óklár og lunkað. Drekk blandingina innan 15 minuttir.
- Tað er týdningarmikið at drekka ríkiligt, minst ein litur innan fáar tímar, aftaná hvørt brævið av Picoprep.
Kl. 21.00:
- Blanda næsta brævið av Picoprep á sama hátt, sum kl. 15.00, sí omanfyri.
Kanningardagin:.
Tú skalt vera fastandi frá midnátt, tó kanst tú drekka vatn ella saft til kl. 6.00.
Tú møtir fastandi á deildini um morgunin, sum kanningin fer fram. Fasta vil siga ikki at eta, drekka ella roykja.Tú fært klæðir frá okkum at fara í.
Undir kanning
Tú skalt møta fastandi á seingjardeildini til avtalaða tíð. Kanningin tekur ½-1 tíma og verður gjørd á skurðdeildini. Beint undan kanningini verður nál løgd í eina æðr í arminum, so tað er møguligt at geva doyvandi og linnandi heilivág. Tú liggur á vinstru lið í songini. Ein slanga verður førd inn í baktarmin og upp í langan. Fyri at síggja tarmrovuna, verður luft blást inn í tarmin, meðan kanningin verður gjørd. Hetta kann spenna, trýsta og geva magapínu. Tú kanst verða plágað/ur av luft í tarmunum restina av degnum.
Eftir kanning
Tá ið tú ert vaknað/ur, kemur tú aftur á seingjardeildina. Læknin kemur á deildina seinni um dagin og sigur tær, hvat hann hevur sæð. Av tí, at tú hevur fingið doyvandi heilivág, mást tú ikki koyra bil restina av degnum. Heilivágurin ger eisini, at tú møguliga ikki minnist alt frá kanningini. Fært tú sterka magapínu, varnast tú blóð í opningi ella frískt blóð frá baktarminum, skalt tú venda tær til sjúkrahúsið.
Uppfylging
Er vevnaður tikin til kanningar, ganga 1-2 vikur at fáa svar. Avtalað verður, hvussu úrslitið skal latast.
Samband
Deild
Skurðdeildin á Suðuroyar SjúkrahúsiLeiðandi starvsfólk
Agnete Vestergaardagnete@ssh.fo
Samband
Deild
Seingjadeildin á Suðuroyar SjúkrahúsiVitjanartíð
Leiðandi starvsfólk
Lisbet Jacobsenlisbet@ssh.fo
Hent kunning
Finn veg
Adressan er Sjúkrahúsbrekkan 19, 800 Tvøroyri.
Parkering
Parkeringsøki er omanfyri sjúkrahúsið. Hesi eru burturav til sjúklingar og vitjandi á sjúkrahúsinum. Parkeringsøki er eisini eystanfyri við ambulansuinnkoyringina/kapellið. Hesi eru tó ofta upptikin av starvsfólkum.
Eisini eru kommunal parkeringsøki sunnanfyri sjúkrahúsið.
Tað kann til tíðir vera trupult at finna pláss tætt við sjúkrahúsið. Tí er gott at vera í góðari tíð, ella at seta sjúklingin av við inngongdina og parkera bilin.
Leiðbeiningin
Leiðbeiningin er á 2. hædd á sjúkrahúsinum. Leiðbeiningin er opin mánadag-hósdag frá 8.00-15.30 og fríggjadag frá 8.00-15.00.
Sjúklingar og onnur, ið hava avtalu á Rannsóknarstovuni, Skurðambulatoriinum, Røntgen/CT-skanning, Ergo- og fysioterapiini og Pínuklinikkini, skulu venda sær til leiðbeiningina.
Sjúklingar og onnur, ið skulu avgreiða inn- og útgjaldingar v.m., skulu somuleiðis venda sær til leiðbeiningina.
Tel. 34 33 00
Teldupostur: ssh@ssh.fo
Sjúklingaskrivstovan
Sjúklingaskrivstovan er staðsett í leiðbeiningini á 2. hædd. Her kunnu sjúklingar, ið skulu til viðgerð uttanlands venda sær.
Tel. 34 33 00
Kantinan
Kantinan er á 2. hædd á sjúkrahúsinum og er opin fyri sjúklingum, avvarðandi og starvsfólki allar gerandisdagar frá kl. 11:30-13:00.
Internet
Á Suðuroyar Sjúkrahúsi er gestanet, ið er opið til øll at brúka. Netið eitur Heilsunet-Guest.
Sosialir miðlar
Suðuroyar Sjúkrahús brúkar Facebook til at leggja tíðindi, myndir, kunning og størv út til tykkum at síggja.
Seingjadeildin hevur profil á Instagram.
Tit eru vælkomin at fylgja við.
Blómur
Á seingjadeildini er loyvt at hava avskornar blómur. Tosa við starvsfólkini um, hvussu tú skalt gera við blómurnar. Urtapottar kunnu ikki vera á deildini.