CT skanning av langanum

Tak blóðroynd áðrenn kanning
Okkum tørva eina blóðroynd av tínum se-kreatinini áðrenn kanningina. Hevur tú diabetes, skal blóðroyndin ikki vera eldri enn 1 viku. Hevur tú ikki diabetes, skal blóðroyndin ikki vera eldri enn 3 mánaðir. Set teg í samband við ávísandi lækna fyri at fáa blóðroyndarseðil útflýggjaðan.

Tak tín heilivág sum vanligt
Heilivágur ávirkar ikki kanningina, so tú kanst taka tín heilivág sum vanligt. Tekur tú jarntablettir, skalt tú gevast við hesum 4 dagar áðrenn tú byrjar uppá úttømingina.

Við barn og bróstageving
Boða okkum frá í góðari tíð um tú ert við barn ella gevur bróst, av tí at tað kann ávirka, hvussu ella hvør kanning verður gjørd.

Nýt ikki metalprýði o.a
Áðrenn kanningina – og helst heimanifrá – skalt tú taka allir metallutir, sum t.d. metalprýði, ur, og piercingar av.

Úttøming
Tað er umráðandi at tú ert væl úttømd/ur áðrenn kanning. Tí skalt tú minst 2 gerandisdagar áðrenn kanningina, keypa Picoprepp pulvur, og Dulcolax tablettir, sum fæst í hondkeyp á Apotekinum, og fylgja vegleiðingini her -> Úttøming

Á KANNINGARDEGNUM

Drekk skuggaevni
Til kanningina skalt tú drekka skuggaevni (Omnipaque 350 mg/ml), sum skal heintast á Røntgendeildini áðrenn kanningardagin. Tú ert eisini vælkomin at møta á
Røntgendeildini 3 tímar áðrenn kanning, og drekka á deildini um ikki tilber at heinta skuggaevni áðrenn kanningardagin.

Blandingin er 1 litur av vatni og 50 ml av skuggaevni, og bert helvtin av blandingini skal drekkast, helst innan 5 minuttir. Restin skal beinast burtur í vanliga frárensli.

Vit geva tær klæðir at fara í. Tú liggur á einari legu, sum flytir seg ígjøgnum CT skannarin, sum er formaður sum ein ringur, ið er opin í báðum endum. Meðan legan flytur seg, tekur skannarin myndir av kroppinum. Við atliti til myndagóðskuna, er tað týdningarmikið, at tú liggur still/ur, og ikki hevur nakað metal á tær.

Luft verður blást inn í langan
Eitt tunt plastik rør verður sett upp í endatarmin, og ein pumpa blæsur luft inn. Ein lítil ballón á endanum á plastrørinum tryggjar, at rørið ikki dettur úr tarminum, men tað er umráðandi, at tú eisini hjálpur til, at halda luftina inni. Pumpan mátar trýstið í langanum undir innblæsingini, og tað kann spenna og geva pínu í búkinum. Hetta forsvinnur tó, tá ið skanningin er liðug, og trýstið minkar aftur. Fyri at fáa eina væleydnaða kanning, er umráðandi at nokk av luft er í langanum. Ein skanning verður gjørd í rygglegu, og ein í búklegu.

Kanningin tekur umleið 1 tíma tilsamans.

Um tú skalt hava skuggaevni (kontrast)
Til nakrar kanningar er neyðugt at geva skuggaevni inn í æðrarnar. Skuggaevni er ein klár væta sum sæst á myndunum, og sum ger tað lættari hjá røntgenlæknunum at lesa myndirnar. Tú fært eitt lítið katetur (venflon) lagt í eina æðr við einari nál, og skuggaevnið verður sprænt inn undir skanningini. Tú kanst fáa kensluna av hita í øllum kroppinum, trongd til at lata vatnið og metal smakk í munnin. Hetta fer tó skjótt burtur aftur. Kateturið verður tikið úr, tá ið skanningin er liðug.

Um tú hevur fingið skuggaevni
Skuggaevni kann elva til ovurviðkvæmi, og tí skalt tú bíða í móttøkuni á Røntgendeildini í 30 minuttir eftir at tú hevur fingið skuggaevni. Ovurviðkvæmi kann m.a. vísa seg við útslett, kvalma, spýggju, trongd ella skriða í hálsinum. Merkir tú nakað óvanligt, skalt tú siga frá í móttøkuni á Røntgendeildini.

Drekk ríkiligt
Drekk nógva vætu restina av degnum t.d. vatn, saft ella juice – minst 2 litrar. Tá ið kroppurin fær nokk av vætu, hjálpur tú nýrunum at reinsa skuggaevnið úr kroppinum aftur. Eftir einum døgni er alt skuggaevni farið úr kroppinum við landinum, og hetta hvørki sæst ella merkist. Tú kanst verða plágaður av luft í tarmunum restina av degnum.

Vend tær til kommunulæknan ella læknavaktina
Fært tú sterka magapínu, varnast blóð í opningi ella frískt blóð frá baktarminum skal tú beinanvegin venda tær til tín kommunulækna og greiða frá tínari støðu, sum so kann ávísa teg til skaðastovuna. Er tað eftir uttanfyri viðtalutíð, skalt tú venda tær til læknavaktina á tlf: 1870.

Svar uppá kanningina verður latið ávísandi lækna, og tú skalt sjálv/ur biðja um svarið, uttan so at onnur avtala er gjørd. Tú fært nærri kunning um svartíðina á kanningardegnum.

Hevur tú spurningar um kanningina, ert tú vælkomin at seta teg í samband við Røntgendeildina.