CT skanning
Ein CT skanning er ein teldustýrd røntgenmyndatøka, har tað er møguligt at kanna ymiskar partar av kroppinum. Ein CT skanning vísir gøgnini meira nágreiniligt, enn ein vanlig røntgenmynd.
Nærri kunning um kanning
Innan kanning
Tak tín heilivág sum vanligt
Heilivágur ávirkar ikki kanningina, so tú kanst taka tín heilivág sum vanligt.
Tak blóðroynd áðrenn kanning
Til nakrar CT skanningar er neyðugt at geva skuggaevni (kontrast) inn í æðrarnar - les meira um hetta undir punktinum "undir kanning". Tá er neyðugt hjá okkum at hava blóðroynd av tínum kreatinini. Tú fært blóðroyndarseðil útflýggjaðan frá ávísandi lækna.
Um tú skalt drekka vatn
Til nakrar kanningar av búkinum, er neyðugt at drekka vatn áðrenn kanningina. Um so er, fært tú nærri boð um hetta, tá ið tú verður innkallað/ur.
Við barn og bróstageving
Boða okkum frá í góðari tíð, um tú ert við barn ella gevur bróst, av tí at tað kann ávirka, hvør kann skal gerast og hvussu.
Nýt ikki metalprýði
Áðrenn kanningina – og helst heimanifrá – skalt tú taka burtur allar metallutir á tí økinum, sum skal kannast. Tað kann t.d. vera smúkkur, ur og snarlás. o.a.
Undir kanning
Tú liggur á einari legu, sum flytir seg ígjøgnum CT skannarin. Meðan legan flytir seg, tekur skannarin myndir av kroppinum. Við atliti til myndagóðskuna er tað týdningarmikið, at tú liggur still/ur og ikki hevur nakað metal á tær.
Um tú skalt hava skuggaevni
Til nakrar kanningar er neyðugt at geva skuggaevni inn í æðrarnar. Skuggaevni er ein klár væta, sum ger tað lættari hjá røntgenlæknunum at tulka myndirnar. Tú fært eitt lítið katetur lagt í eina æðr við einari nál, og skuggaevnið verður sprænt inn undir skanningini. Tú kanst fáa kensluna av hita í øllum kroppinum, trongd til at lata vatnið og metal smakk í munnin. Hetta fer tó skjótt burtur aftur. Kateturið verður tikið úr, tá ið skanningin er liðug.
Kanningartíð
Kanningartíðin er ymisk, alt eftir hvat tú skal kannast fyri. Skalt tú hava skuggaevni inn í eina æðr, tekur tað longri tíð. Kanningartíðin kann sostatt vera frá umleið 10- 40 min.
Eftir kanning
Um tú hevur fingið skuggaevni
Skuggaevni kann elva til ovurviðkvæmi, og tí skalt tú bíða í móttøkuni á Røntgendeildini í ½ tíma eftir at tú hevur fingið skuggaevni. Ovurviðkvæmi kann m.a. vísa seg við útslett, kvalma, spýggju, trongd ella skriða í hálsinum. Merkir tú nakað óvanligt, skalt tú siga frá í móttøkuni á Røntgendeildini.
Drekk ríkiligt
Drekk nógva vætu restina av degnum t.d. vatn, saft ella juice. Tá ið kroppurin fær nokk av vætu, hjálpir tú nýrunum at fáa skuggaevni úr kroppinum aftur. Eftir einum døgni er alt skuggaevni farið úr kroppinum við landinum, og tú hvørki sært ella merkir meir til tað.
Uppfylging
Svar uppá kanningina fer til ávísandi lækna ella deild, og tú skalt sjálv/ur biðja um svarið, uttan so at onnur avtala er gjørd. Tú fært nærri kunning um svartíðina á kanningardegnum.
Hevur tú spurningar um kanningina, ert tú vælkomin at seta teg í samband við Røntgendeildina.
Samband
Deild
Røntgendeildin á Landssjúkrahúsinum2. hædd í B bygninginum
Leiðandi starvsfólk
Lisa FrederiksbergLisa.Frederiksberg@ls.fo
Hent kunning
Leiðbeining
Leiðbeiningin liggur við høvuðsdyrnar í forhøllini á Landssjúkrahúsinum.
Leiðbeiningin útvegar lyklar til Gestalonina, til starvsfólkaíbúðirnar og umsitir nógvar aðrar uppgávur.
Leiðbeining er mannað alt samdøgrið, allar dagar, tó skal ringjast á høvuðsdyrnar millum kl. 23.00-07.00.
Tel. 304500
Teldupostur: leidbeining@ls.fo
Parkering
Við høvuðsdyrnar á J.C. Svabosgøtu
Til ber at parkera í 1 tíma við parkeringsøkið við høvuðsdyrnar. Tó er ikki altíð lætt at finna P-pláss. Er tú sjúklingur, ið skalt til viðtalu, verður tí mælt til, at tú kemur á Landssjúkrahúsið í góðari tíð.
Væntar tú at verða longri á Landssjúkrahúsinum, ber til at fáa veitt eitt serstakt loyvi til longri parkering við at venda tær til Leiðbeiningina í forhøllini. Tú skalt tá upplýsa nummarplátu á tínum bili, og leggja loyvið, tú fært útflýggjað, á eitt sjónligt stað í bilinum.
Við Sandágerð
Niðanfyri Landssjúkrahúsið til høgru eru tvey stór parkeringspláss. Her er loyvt at lata bilin standa í 8 tímar.
Á Eirargarði
Hevur tú avtalu ella onnur ørindi á Eirargarði, er møguligt at parkera óavmarkaða tíð.
Um tú ert blóðgevi
Skalt tú geva blóð, ber til at parkera á serstøkum parkeringsøki til blóðgevar, niðanfyri Landssjúkrahúsið við Álaker, har inngongdin til Rannsóknarstovuna er. Har er óavmarkað parkering fyri blóðgevar. Onnur, ið ikki skulu geva blóð, eiga ikki seta bilin frá sær á hesum parkeringsøki.
Matur
Á Landssjúkrahúsinum eru fleiri møguleikar at fáa ein betri bita. Maturin kann njótast í hugnaligum umhvørvi við borðini í forhøllini ella kann takast við heim. Morgunmatur kann keypast Mánadag til Leygardag. Eisini ber til at keypa smyrjibreyð, skundverðar, dessertir og ymiskt søtt til góman.
Heitur matur
Gerandisdagar kann heitur matur keypast til døgurða, umframt okkurt omaná. Døgurði er at fáa ímillum kl. 11:30 og 13:00. Sí dagsins rætt her.
Salatbarr
Gerandisdagar kanst tú gera tær fjølbroytta salat við heimabakaðum smábreyði í salatbarrini. Salatbarrin er sjálvtøka og er opin frá kl. 11:30 – 16:30.
Orkuríkar vørur
Køkurin hevur heimagjørdan proteindrykk, orkuríkan snaps, suppur, fromasjur og ísar. Hetta kann keypast í Kafeini, sí vøruúrval her. Køkurin ger eisini tyggi- og svølgivinarligan mat, sum er til keyps í Køkinum.
Upp- og afturlatingartíðir
Mándag-fríggjadag kl. 08:00 – 20:30
Leygardag kl. 10:00 – 20:30
Sunnudag kl. 14:30 – 20:30
Blómur
Vitjandi eru vælkomin at taka avskornar ella turkaðar blómur við til innløgd á Landssjúkrahúsinum. Tað er tó ikki loyvt at taka plantur við mold við inn á klinisk øki.
Internet
Á Landssjúkrahúsinum er gestanet, ið er opið til øll at brúka. Netið eitur Heilsunet-Guest.
Sosialir miðlar
Royking
Tað er ikki loyvt at roykja á Landssjúkrahúsinum. Uttanfyri høvuðsdyrnar er eitt tilskilað økið til royking.
Gisting
Sjúklingar og barnakonur búsitandi uttanfyri Suðurstreymoy, sum ikki verða innløgd, hava møguleikan at gista í Gestalonini. Tað sama er galdandi fyri avvarðandi.
Gestalonin á Landssjúkrahúsinum er staðsett á Eiragarði 4.
Les meira um Gestalonina her.