Skurðviðgerð fyri ov stóran prostata

Far í bað um kvøldið ella morgunin áðrenn skurðviðgerðina. 
Vaska tær væl við vatni og sápu – serliga í neðra, undir forhúðini og í nalvanum. Far í rein klæði. Tak ur og aðrar prýðislutir av. Ikki smyrja kroppin við kremi eftir baðið, tí 
tað ger tað trupult at reinsa húðina áðrenn skurðviðgerðina.

Áðrenn skurðviðgerð verður journalupptøka gjørd.

Skurðviðgerðin verður antin gjørd undir fullari doyving ella undir ryggdoyving.
Læknin, sum skal skurðviðgera teg, tosar fyrst við teg um skurðviðgerðina. Aftaná samrøðuna verður tú doyvdur.

Tað er vandi fyri komplikatiónum við hvørjari skurðviðgerð. 
Við hesari skurðviðgerðini er vandi fyri at fáa blóðtøpp í beinini. Fyri at minka um vandan fært tú eina sproytu við blóðtynnandi heilivági antin áðrenn ella eftir skurðviðgerðina.

Undir skurðviðgerðini førir læknin ein kikara og eina lítla elektriska sleingju inn gjøgnum urinrørið, sum tekur av prostata, soleiðis at leiðin í landgøgnunum verður 
størri.

Undir skurðviðgerðini verður eitt katetur lagt í bløðruna. Katetrið skolar bløðruna reina fyri blóð, og tú skal hava tað í, til bløðran ikki bløðir meir. Tástaðni kann katetrið takast úr. 

Um tú hevur trupult við at tøma bløðruna eftir katetrið er tikið úr, verður tað lagt í aftur, og verður tú útskrivaður við katetrinum. Um so er, fært tú eina tíð til at taka katetrið úr nakrar dagar eftir, tú ert útskrivaður.

Tað er umráðandi at koma skjótt úr songini eftir skurðviðgerðina og at koma í gongd við at røra seg. Tað minkar um vandan fyri fylgjum. Tú kanst vænta, at vit biðja teg reisa teg úr songini longu nakrar tímar eftir skurðviðgerðina og koma upp at ganga. Vit stuðla tær í tí, sum tú hevur tørv á.
Tað er umráðandi at fáa fysioterapi við kokubotnsvenjingum  eftir skurðviðgerðina.

Tá ið tú ert komin heim, mást tú halda teg í frið tær fyrstu 2-3 vikurnar eftir skurðviðgerðina. Tí mást tú ikki lyfta nakað tungt, hava samlegu, renna ella súkkla. Tú kanst vænta at verða sjúkrameldaður í eina viku eftir skurðviðgerð.

Trongdin at pissa er meiri máttmikil fyrstu tíðina eftir skurðviðgerðina, og tú kanst hava trupult við at halda uppá vatnið. Hetta kallast urininkontinens. Tað kann verða trupult at náa út á vesið til tíðina, og tí er kanska neyðugt at brúka eina lítla blæu í stutta tíð. Varandi urininkontinens eftir skurðviðgerð kemur sjáldan fyri.

Tað er vandi fyri bløðrubruna, tá ið tú ert skurðviðgjørdur í urinleiðunum. Rivur kunnu vera á urinrørinum og bakteriur koma í. Tú kanst fyribyrgja bløðrubruna við at drekka ríkiligt av vatni, so bløðran verður skolað væl ígjøgnum.

Um tú fært sjúkueyðkenni - s.s.:

• fepur
• varandi svia, tá ið tú kastar tær vatnið
• illaluktandi ella gruggut land
• ella pissar títtari dagliga

skalt tú lata inn eina urinroynd hjá tínum kommunulækna.

Tú kanst hava lætta pínu ella ampa í bløðruni og urinrørinum eftir skurðviðgerðina. Pínustillandi, sum fæst í handkeyp, kann linna. Vit mæla til, at tú keypir hetta áðrenn skurðviðgerðina.

Blóð í urininum eftir skurðviðgerðina
Fyrstu dagarnar eftir skurðviðgerðina kann urinið verða reydligt ella myrkt, og tú fært títtari og knappligari vatnlát við eitt sindur av svia. 

Umleið 10 dagar eftir skurðviðgerðina fara sárskorpurnar innvortis at detta av, og tað kann koma blóð í urinið aftur.

Um tú drekkur tveir litrar av vatni dagliga, verður bløðran skolað væl ígjøgnum. Um blóðið ikki fer burtur, er myrkt ella blóðsveitar eru í, set teg so í samband við lækna.

Tú kanst vænta, at sáðavgongan kann verða øðrvísi eftir skurðviðgerðina. Sáðið kann renna upp í bløðruna ístaðin og tømist næstu ferð, tú kastar tær av vatninum.

Roknast kann við at tað ganga 3-4 mánaðir, áðrenn vit kunnu meta um úrslitið av skurðviðgerðini.

Tú verður innkallaður til kontroll áleið seks mánaðir eftir skurðviðgerðina. Tá kanna vit megina av urinstráluni, og hvussu væl tú tømir bløðruna.

Hevur tú spurningar, ert tú vælkomin at seta teg í samband við okkum.