Endurvenjing eftir heilabløðing

Eftir avtalu við sjúkrahúsdeildina kemur fysioterapeutur og ergoterapeutur á sjúkrahúsdeildina at meta um tína støðu. Út frá hesum leggja teir eina ætlan fyri tína endurvenjing.

Byrjað verður varliga við rørsluvenjingum. Hetta kann vera alt frá at koma upp at sita, standa ella bara at venda tær í seingini. Fyrstu dagarnar venja vit á deildini. So hvørt sum støðan batnar, heldur venjingin fram í Ergo- og fysioterapiini. Vit meta um loypandi og økja um torleikan í venjingini, so hvørt sum tú tekur teg fram í fysisku venjingunum.

Tað eru nógv atlit at taka í mun til tína støðu. Vit skulu hava í huga, at tørvur møguliga verður á heimavitjan, hjálpartólum o.a. Tá tú ert til reiðar til útskriving, hava vit tikið øll neyðug atlit, soleiðis at heimið og aðrar umstøður hesum viðvíkjandi eru nøktandi.

Við útskrivan fært tú eina tíð til ambulanta venjing. Vit venja tríggjar ferðir um vikuna í umleið 3-6 mánaðir. Eftir hetta ert tú vælkomin at venja í Ergo- og fysioterapiini tvær ferðir árliga.

Endurvenjingin krevur tætt samskifti við teg og tíni avvarðandi.